F4演唱會第四場(3月25日)

因為萬人迷Irene話前兩日間舖差o的比人踩爛，問我可唔可以過去幫手，梗係可以啦，本來諗住去Jerry o個個fans聚餐，結果我叫左Wendy代我去，由於之前有幫過佢o地手o既經驗，我都係食左o野兼買定一支大水先落去，去到時12點正，我未行到萬人迷門口已經嚇親，多人到我行唔到埋去，多數係日本人同埋泰國人，叫佢o地讓個位比我入去又冇人理我，打電話比Irene佢又冇聽，行又行唔到，我唯有大嗌 "IRENE, 我係ANNIE呀，我入唔到o黎呀!!!!!" ，結果係Irene o既朋友楊小姐聽到o係入面夾硬拉我入去，入到我個袋都爛左，o的相好似唔駛錢咁，個個都搶住要，足足企到6點鐘，Wendy同Julie o黎到幫手同o的日本人翻譯，同埋差唔多開場，先可以散o的人，我o地都趕落去紅館。

今晚o既位置唔係咁好，坐左o係綠區o既轉灣位，坐低之後發現柴姐，蕭定一同埋Vanness o既唔知係daddy定係爺爺坐o係第一行，Vanness媽咪坐o係佢o地後面，萬人迷同我坐，後尾佢都左去前面影相，好彩今晚企我o地o個邊o既食蕉都算好人，比我捐到去前面，不過又比我見到小儀o係度，我都未行到埋去，佢望住我又鬧"妳唔好撞到o的嘉賓呀，妳有冇攪錯呀，妳都唔係坐呢度"，佢夠行左出o黎啦，咁驚會撞到嘉賓就坐定定唔好行出o黎呀~~~ 我已經好嬲，準備回敬佢時Julie剛剛捐到入o黎，佢立即同佢講o野引開佢注意，跟住Jerry出o黎，我都費事理佢~~

唔知柴姐坐o係前面係好彩定唔好彩，F4四個行過都會同佢打招呼兼抱抱，跟住就行開，所以今晚都係全靠Julie幫手我先握到仔仔，但係就可以睇得佢o地耐o的同埋清楚o的；唔明點解Jerry要咁多謝Fenny，重要喊到好似佢死左咁，跟住又要拉柴姐出o黎，不過見到佢o地好似 "一抱憫恩仇" 咁，我都睇到眼濕濕， 都好o既，多個朋友點都好過多過敵人o既~~

當然今晚最驚喜o既係Vanness同Jerry o既crossover啦，冇諗過Jerry 跳舞o個part 會突然出現，Vanness出場鬼咁型仔，佢用支槍指住Jerry時，見到Jerry忍唔住笑，仲要扮中槍笑住咁訓低，好盞鬼呀；到Vanness出o黎跳舞時Jerry又突然走出o黎一齊跳，雖然Jerry冇Vanness跳得咁好，但係都算好合拍喎；而仔仔同Ken o既crossover就有o的悶；到Vanness出o黎唱韓文歌時拉左兩個著左和服o既日本fans出o黎一齊唱，見到佢o地兩個開心到喊左出o黎，點知Vanness再唱埋隻日文歌，o的日本fans開心到暈呀；好快就到最後o個part，見到F3叫Ken除衫，然後Ken o既表情都好過癮，覺得佢o地o既感情好似好番好多，尤其係Jerry同Ken, 跟住大合唱時我覺得好唔捨得，預備左叫ENCORE，諗住佢o地點都會再出o黎，點知叫到工作人員開始拆台我o地先肯走，因為我要跟住去慶功宴，所以都立即走。 (原來個臺降落緊o既時候Jerry成件外套除左露埋點呀，坐o係山頂o既人先睇到o架，點解唔早o的除呀~~)

慶功宴o係都會海逸o既 coffe shop舉行，入到去見到set左一個好細o既臺，差唔多9成都係日本fans，佢o地好多都著都好隆重，我仲見到薰妮，同幾個唔記得名o既議員，個臺已經比電視台攝影師同埋fans圍住，到F4出o黎時o的人湧o西去前面，o的日本fans企o西上凳，我後面有兩個著得好靚o既名緩o係度講 "嘩，真係好靚仔呀~~"，唔係卦，而家先知？ 我就乜都睇唔到， 我只好行返上去buffet臺前面離遠先見到少少Jerry, 到媒體記者訪問完我先行埋去臺邊企上張凳先見到少少，實左睇到好辛苦，所以我放棄唔睇，走左去羅西瓜食，都食唔夠兩件，個慶功宴已經完喇，前後都唔知有冇15分鐘，咁就要成$3000-，真係唔抵，好彩我唔駛比錢入o黎，跟住我出去會合番Julie o地，原來出面o的fans列o西隊o係門口等，但係F4已經o係第二個通道走左，我o地坐左一陣到走喇，聽日重要去幫萬人迷手呀~~

P.S. 今晚見到一個fans好似Carmen o架(梗係冇文文咁靚女啦~~)

F4演唱會第三場(3月24日)

今日一早就起身，重慘過返工，食完早餐後，跟住買左一大堆報紙雜誌上左Daisy公司借佢o地個conference room比我繼續撲飛(亞四，唔好意思呀，唔記得問左妳先，因為o個幾日我已經傻傻o地，sorry呀~~)，其實我好唔舒服，又暈又凍又眼訓，到下晝頂唔順坐左o係地下瞌左半個鐘，跟住就趕去紅館，都幾期待今晚，因為係4晚中坐得最前(紅區I行)。

今晚覺得氣氛熱烈好多，同埋好多日本人，而且我o地幾個戰友可以坐埋一齊(其他幾場都要分開坐)，同埋企o係我o地個邊o既食蕉好好人，比我o地走去前面有唔鬧我o地，開場見到Jerry一開始已經暗笑，都知佢心情應該好好，點知今晚Jerry少左o係紅區出現，好彩佢都肯行過o黎我o地前面，所以今晚都可以同佢握到手，好開心呀~~，估唔到o既係Ken o係我前面行過時，我企o係第二行o既位置，諗住握到就握，握唔到就算，Ken明明已經行過左我前面，唔知點解突然行番轉頭伸長隻手同我握手(我冇叫佢o架，我仲戴住頂Jerry帽添呀~~)，加番佢少少分先!!!

到最後佢o地完場時個台降落緊時見到Jerry突然抱起仔仔，嚇到仔仔死，Jerry好似唔夠力就o黎跣手時，Ken走埋去想幫手，仔仔落返地後用手打左Jerry一下，好鬼攪笑，好得意呀~~

今晚我覺得好正呀~~~~~

F4演唱會第二場(3月23日)

今日真係頂唔順，訓到11點幾先起身，下晝約左Daisy食lunch，跟住上左Julie o既舊老細Wendy公司o既conferece room繼續撲飛，佢一路開會一路搵飛，我都服左佢。

今晚o既演唱會比前一晚順暢，但係覺得Jerry仍然唔開心，估唔到言媽媽都係坐上客，因為已經睇左第一晚，知道o西o的rundown，所以冇咁緊張，但係我都叫足成晚；諗唔到Vanness今晚會唱韓文歌，而Jerry拉左一個大肥妹上台，仲要拖住佢唱歌，最後加一個抱抱，羨慕死我喇~~~

F4演唱會第一場(3月22日)

上個月今日剛剛係F4第一場演唱會開始，到而家先可以坐定定咁講番o的感受，其實演唱會之前3星期已經為左o的飛不停咁忙，中間實左太多意想唔到o既意外發生，重慘過真係賣飛o既人，我呢兩個月o既手提電話費用左$1400-，每日不停咁update邊個要邊場，$480定係250 ，要綠區定籃區，要邊行，要幾多張~~~，每日又要返工，放工就去搵飛，平均每日訓2-3個鐘，簡直人都癲，為免影響份工，咁矯公司要清假，我就由3月22日下午開始放兩日半假，一路至27號先返工。

3月22日下午一放工約左小麥去都會海逸等JERRY出車，好彩都等到佢出o黎，不過黑口黑臉，又唔肯收禮物，跟住我約左Julie, Patsy同埋同事Carnolyn去左紅磡火車站o既麥記一個可以望到拜神位置o既臺坐，因為紅館o個邊實在太恐怖，點到無可能睇到，咁不如離遠睇都好呀，到6點幾佢o地先出o黎，前後到唔夠5分鐘就入返去，o的fans好多一早已經o係度等，我都冇咁o既能耐，都係等開場好過~~~

終於等到開場，呢晚我同Julie左o係紅區o既08行，即係第12行，第4，5位，其實呢區應該係背台，坐低之後發現台灣fans雪球竟然坐o係我前面，佢一企起身就會完完全全咁遮o西我，真係慘~~，意想唔到開始時竟然係Jerry o係我o地呢區出場，Julie 就搵機會出去影相，因為我袋住咁多飛o係身，責任重大，只好坐o係度唔敢出去，後尾發現原來坐o係我o地側邊o個兩個靚女好好人，佢肯幫我o地睇住個袋，到Jerry再出場時我忍唔住走埋出去，但係Jerry每次就o黎走到我o地前面就會兜路行開，點解會咁o架？？？ 後來發現原來欣欣同大隊長坐左o係第一行!!!! 之後F4四個都出o西o黎，我同仔仔，Ken 同埋Vanness都握到手，Vanness更加係握住我唔放，到佢比食蕉拉走先放手，好開心呀，跟住我就返位坐，始終都掛住o的飛，到第二次Jerry再出場時我先再走出去，今次我去另外一邊，見到小儀企o係第二行，佢望住我然後對住第一行兩個fans好大聲咁話”妳o地小心個袋呀!!!” 我嬲到死呀，不過Jerry已經出場彈琴，而且比我企到欄杆位，所以我唔理佢，點知o個兩個fans竟然同我講話Jerry起碼會彈幾隻歌，叫我返埋位先喎，當我傻o架，梗係唔返去啦，就係咁我先可以同Jerry握埋手咋~~~

好彩今晚Jerry o係紅區o既時間比較多，但係點解今晚o的叫聲咁細o既，而且Jerry好似好唔開心咁，佢跳舞比之前進步同埋放好多，不過太落力，睇見佢撞到個頭，心到痛埋呀；Vanness好fit，跳舞好好睇，唱日文歌都好好聽，不過個look太似Rain；Ken比平時nice；仔仔比我好意外o既感覺，冇諗過佢會咁放，點都露埋；今晚係呢4場坐得最後o既一場，完全冇諗過可以握o西4個隻手，都算係咁喇~~~