點解咁黑仔.....MoMo, 好掛住你呀 ~~~

呢隻咁 Cute o既魔天使仔叫MoMo, 係我陪Irene買佢返屋企，因為佢未養過狗仔，最後經我幫佢搵到新主人，係我 ex 個老板個妹妹Aster, 佢亦都係未養過狗，但係佢好比心機咁養，每日都帶佢返車房開工(當然o係寫字樓啦)，每一個員工，客人，鄰居都好錫佢，除左比較好動之外，佢其實都好聽話，出街到唔使用狗帶；後來佢少左返公司，因為Aster o既爸媽都好錫佢，成日叫佢唔好帶返工，而佢o地就每日都會帶佢落街散步。

自從SaSa走左之後，我多左落去車房探佢，上星期六先剛剛同佢影左呢張相，比佢錫左我幾啖，幾開心呀，點知星期三晚收到我 ex o既電話，話MoMo比車撞死左....

唔係呀？

原來佢爸媽帶佢落街散步，佢媽叫佢爸先行，佢會跟住o黎，而MoMo就行行o下突然想行番轉頭搵佢媽，就係咁比車撞死，最激氣o既係佢爸驚老婆同個女會好傷心，就咁將佢條屍放左o係垃圾桶旁邊， 好彩後尾有朋友陪Aster搵得番佢咋，我 ex 叫佢第二日帶佢去診所，佢o地會幫佢處理。

本來平復左o既心情，又開始亂，好心痛呀，MoMo 只係一歲幾咋，點解咁快就無左，我見到佢咁少都好難過，我 ex 就好唔掂喇，由 SaSa 有病到依家，佢已經瘦左十幾磅，而且失眠情況比我嚴重好多，今次 MoMo 咁突然咁死左，佢都同我講佢好辛苦~~

唯一可以安慰佢 (亦都係安慰自己) o既係.... 佢唔使受 SaSa 病重o既過程，可能都算係一個福份~~


MoMo, 希望你同 SaSa o係天堂可以過得開開心心啦 ~~