做左8號風球o既傻婆

尋晚11點幾睇新聞話今日要徬晚先掛8號，即係今朝要返工，好失落咁訓覺，到6點半時聽到樓下清潔亞嬸好大聲咁話掛8號喇，等我即刻開電視睇，見到仲係3號風球，咁我咪諗住瞌多半個鐘先起身，再開電視，仍然係3號風球，咁我咪立即梳洗完落樓，一落到樓下已經好大風，新遮都吹爛左，行到巴士站，點解無人等巴士o既？？ 立即打比我媽叫佢開電視，佢話係喎，依家真係8號風球喎~~

XYZ XYZ XXXX.....
頭又未乾，返屋企又無得訓，打比蚊蚊，好彩佢都起左身，肯同我食早餐，咁我就即刻搭小巴去柴灣，沿途都好多人好似我咁唔知掛左8號風球，搭左車返工，好無奈咁搭返車返屋企，個個都好似我咁媽媽叉叉~~

真係比個天文台玩死，不過都多謝佢等我同蚊蚊晨咁早咁食早餐再加shopping喇~~~

豆豆...... See you in Paradise

本來尋日好開心o架，點知o係坐巴士返屋企途中，收到表姐Irene電話，話豆豆前晚已經走左，主要係因為腎衰竭引至睇唔到o野，甚至開始聽唔到，同埋已經3日唔肯再食o野，但係佢仲要周圍走想搵Irene想黐住佢，撞到自己損o西，Irene知道佢o既情況已經好差，所以就諗住送佢走，但係驚我承受唔到再一次o既傷心，由佢o既死黨陪佢帶住豆豆去獸醫o個度，o係Irene o既懷抱好安詳咁離開左我o地，Irene settle o西所有o既事，包括佢o既情緒，尋晚先話比我聽....

雖然一早就知道會有呢一日，但係見唔到佢最後一面，又陪唔到Irene去面對最難受o既時刻，個心真係好唔安樂，始終佢我第一隻養o既狗女，超級有人性o既狗，陪Irene, 我同亞南過左12年，真係好唔捨得.....

不過，好慶幸我比豆豆跟左Irene, 等佢可以好好亨福 ~~

表姐，多謝妳幫我照顧到豆豆咁好，姑媽，我老竇，莎莎都會o係天堂照顧佢o架喇 ~~