深圳兩日行

星期六下晝約左Julie, Julie媽咪，Julie好友Carmen一行四人上深圳，搭地鐵去老街站(即係東門)，由於冇食過o野，到步後立即搵左間茶餐廳食o野，叫左兩碟炸兩，三個粥(用瓦煲載住)，一碟菜，一碟淨腸粉，一碟油菜，一個榨菜肉絲湯，四個人都係五十幾蚊，已經飽o下，跟住陪Julie媽咪去批發時裝o既地方入貨，再搭的士去一個叫新書城o既地方睇書，好大o架，有成五層樓係賣書，好多人都o係度打書釘，好鬼有誠品feel o架，而且重有免費寄存行李服務，好方便，跟住大家各自搵書，我搵到候佩岑大陸版寫真，有亞旭o個部分係同本書一樣size，而且係光面，但係都要成三十蚊本，我差o的忍唔住手買，後尾只係買左幾本學日文o既書同字典，重有一本有好多靚靚芝娃娃相o既書，總數都係六十幾蚊，行到九點幾，Julie帶我o地去佢屋企人成日去o既地方打邊爐，九點後每位18蚊人民幣，湯底20蚊人民幣，菜蜜任飲，我o地叫左肥牛，魚餃，鮮雞件，豬肝，魚片，魚蛋，炸腐竹，油麥菜，菠菜，西生菜，唐生菜，蓮藕片，南瓜片，粉絲，芋絲，大豆牙，豆腐，o的材料勁新鮮，因為總數過左五十蚊，再送多一個小菜，我o地揀左一個椒絲肉片，o的椒絲多到差o的見唔到o的肉絲，又惹味，再送埋生果，飽到差o的嘔，埋單101人民幣，跟住先行過對面佳寧娜"瘩"骨，成四點幾先訓。到星期日朝十一點幾起身，Julie拉左我o地去國貿站o既鼎泰豐食o野，環境都幾靚，我o地都有叫小籠包，醉雞，擔擔麵，陽春麵，窩貼，菜肉餃，炸雞飯，味道都唔錯，當然冇台灣咁正啦，不過都係食左百二蚊到，算抵食o架喇，跟住再行過去東門(原來咁近o既，下次唔駛再搭一個站地鐵喇)，我去左mc cafe坐低等佢o地三個再去入貨，睇左一陣間書就跟佢o地經皇崗返香港，好鬼"支力"呀~~~~