好唔開心~~

早兩日收到一個電話，係我做保險時第一次做ROAD SHOW識o既客人，亦都係第一個我完全唔識o既人同我買保險o既客，一個做廚師o既肥仔，佢供左年幾已經斷左保，不過大家都由唔識變左做好朋友，耐唔耐都會出o黎食o下飯，飲o下o野，有時佢老版叫佢煲左o的好o野，佢都會"羅"比我飲，今年佢轉左工後少左聯絡，所以我一時都認唔到佢把聲，聽落都覺得有o的唔對路，點知佢話比我聽佢中左風，已經有半年，而且唔記得我電話，剛剛先記起就打電話比我，佢而家重住o係醫院，咁我咪約左今晚去探佢囉。

我做左咁耐保險，都唔知有間黃大仙醫院，比明愛更殘，當我上到去見到佢o既時間，我完全唔認得佢，佢話比我聽中風o個日佢放工返屋企沖完涼坐低o個時突然覺得頭暈，跟住就成個跌左落地，好彩佢個手提o係佢身邊，立即call佢屋企人報警，跟住就昏迷左，到佢醒番時已經個半月後，醫生話佢救佢o個時已經冇左呼吸，要o係喉嚨開窿幫助呼吸，左邊身癱瘓，完全冇知覺，右邊頭蓋骨切走左做手術，暫時寄存o係廣華，所以佢右邊頭凹左入去，而佢瘦左70幾磅，醫生同佢講最少要兩年先可以有機會有番知覺，不過醫院要佢下星期出院，或者轉去老人院住，佢媽咪都o係最近中左風，為左唔想佢擔心，佢屋企人一路呃佢媽咪話佢返左上大陸做工，我都唔知佢點樣可以繼續呃多兩年，我見到佢咁樣，都唔知講乜好，佢得o個30歲，又完全冇買保險，我驚再留耐o的我會喊，所以我話好"支力"先，佢轉左院就call我，到時再去探佢。

其實呢排自己都好唔開心，探完佢之後就覺得"今日唔知聽日事"，都係唔好諗咁多，最緊要身體健康~~~~